धरानः हङकङमा पहिलो पटक एक नेपाली कोरोना भाइरसबाट संक्रमित भएको भेटिएका छन् ।
पोखरा स्थायी घर भएका २८ वर्षीय गुरुङ थरका युवकको स्वास्थ्य परिक्षण गर्दा कोरोना पोजेटिभ फेला परेको हो । हङकङमा उनी केस नम्बर ३९४ औं मा परेका छन् ।
१० वर्षदेखि हङकङमा बसोबास गर्दै आएका गुरुङ ४ वर्षयता नाइट लाइफका लागि चर्चित लान क्वाइ फोङको बारमा काम गर्दै आएका थिए। आफ्ना सहकर्मीलाई कोरोना भाइरस संक्रमण भएपछि उनको समेत परिक्षण गरिएको थियो। परिक्षण रिपोर्ट पोजेटिभ आएपछि गुरुङलाई कोरोना संक्रमण भएको पुष्टि भएको हो ।
हङकङको सेङ सुइस्थित नर्थ डिष्ट्रिक अस्पतालको आइसीयूमा गुरुङको उपचार भइरहेको छ । अस्पतालको आइसीयूबाटै नेपालखबरको सम्पर्कमा आएका गुरुङले आफुसँगै काम गर्ने व्यक्तिलाई संक्रमण भएको भेटिएपछि परिक्षण गरेको बताए ।
‘मसँगै काम गर्ने व्यक्तिलाई कोरोना फेला परेपछि मलाई पनि गत मंगलबार परिक्षणका लागि लगियो, परिक्षण गर्दा पोजेटिभ रिपोर्ट आएको डाक्टरले बताए’, गुरुङले आइसीयूबाट फोनमा भने, ‘तर मलाई त्यस्तो कुनै कमजोरीको लक्षण देखा परेको छैन ।’ गुरुङ सहित हङकङमा ४१० जना कोरोना भाइरसबाट संक्रमित भइसकेका छन् भने ४ जनाको ज्यान गइसकेको छ ।

LEAVE A REPLY

Please enter your comment!
Please enter your name here