धरानः विश्वव्यापी महामारी कोरोना भाइरस (कोभिड १९) सङ्क्रमणबाट बच्न सरकारले आज (सोमबार) देखि देशैभर लामो दूरीका सवारीसाधन सञ्चालनमा रोक लगाएको छ ।
प्रधानमन्त्री केपी शर्मा ओलीले गत शुक्रबार साँझ राष्ट्रका नाममा सम्बोधन गर्ने क्रममा यो जानकारी गराइसकेका छन् । प्रधानमन्त्री ओलीले गरेको सम्बोधनमा भनिएको छ, ‘आगामी चैत १० गते (आज) देखि केही अवधिका लागि नेपालभर चल्ने सबै प्रकारका लामो दुरीका यात्रुवाहक सवारी साधनहरू सञ्चालनमा रोक लगाइएको छ ।’
लामो दूरीअन्तर्गत एक जिल्लाबाट अर्काे जिल्लामा पनि गाडी चलाउन नपाइने ट्राफिक प्रहरीले जनाएको छ । आज धरानका सडक बिहानैदेखि सुनसान बने । सार्वजनिक सवारीसाधनको संख्या ह्वात्तै घटेको छ भने निजी सवारीसाधन पनि कमै चलेका छन् ।
विशेषतः धरानबाट पहाडी क्षेत्रमा जाने यात्रु भानुचोकमा आएर सवारी साधन रुँगेर बस्ने पनि छन् । सयौं यात्रु अहिले भानुचोकमा बन्दको बेलाझैं सवारी कुरेर बसिरहेका छन् । कोरोनाबारे अझै नागरिक तहमा सजगता आइनसक्दा यात्रुहरू अलपत्र परेका हुन् । ‘कोरोनाको त्रास अहिले विश्वव्यापी छ तर सजगता र सचेतनाले नै यसलाई जित्न सकिन्छ भन्ने उदाहरण चीन पनि हो । तर नेपालका नागरिकमा अझै चेत खुलेको छैन ।’, धरान–१२ प्रविन विशुङ्खे भन्छन् ।
सम्बोधनमा ‘केही अवधिका लागि’ भनिएकाले यो बन्द कहिलेसम्म जारी रहन्छ भन्ने अनिश्चित देखिन्छ । सम्भवतः कोरोना महामारीको अवस्था हेरेर बन्द खुलाउने सरकारको तयारी हुन सक्छ । तर यो महामारी कहिले साम्य हुन्छ भन्न सकिने स्थिति नरहेकाले यातायात कहिले खुल्छ अहिल्यै भन्न गाह्रो छ । 

LEAVE A REPLY

Please enter your comment!
Please enter your name here