धरानः सरकारी स्कुलमा पढाइ राम्रो हुँदैन र छोराछोरीले गुणस्तरीय शिक्षा प्राप्त गर्न सक्दैनन् भन्ने धारणालाई चिर्दै अघि बढेको धरानको पब्लिक हाइस्कुलले यस शैक्षिक सत्रदेखि कक्षा-९ सम्म अंग्रेजी माध्यममा अध्ययन अध्यापन थालिने भएको छ ।
विद्यालयमा बसेको बैठकले यस्तो निर्णय गरेको हो । शिशु कक्षादेखि कक्षा–९ सम्म अंग्रेजी माध्यमबाट पठनपाठन गर्ने निर्णय गरेको हो । बुधबार बसेको विद्यालय व्यवस्थापन समितिको बैठकले यस्तो निर्णय गरेको जनाएको छ ।
कक्षा ६ देखि ९ सम्मको अंग्रेजी मिडियमको कक्षा बिहान ६ बजेदेखि ११ बजेसम्म सञ्चालन गर्ने र कक्षा १ देखि ५ सम्म अनिवार्य दिउँसो ९ बजेदेखि अंग्रजी मिडियममा पढाइ हुने प्रधानाध्यापक इन्द्रमोहन झाले जानकारी दिए । विहानको कक्षामा कक्षा–११ र १२ र दिउँसोको कक्षामा नेपाली मिडियममा कक्षा ७ देखि कक्षा १० सम्म अंगे्रजीमा पठनपाठन हुने प्रधानाध्यापक झाले बताए । ‘धरानका बोर्डिङ स्कुलको जस्तै शिक्षा दिन खोजिएको छ, निजी विद्यालयसँग प्रतिस्पर्धा गर्नुछ’, उनले भने, ‘त्यही भएर पनि शैक्षिक सत्रदेखि अंग्रेजी माध्यम थालिने भएको हो ।’
विद्यार्थीहरूको मागलाई मध्यनजर गर्दैै विद्यालयले २ वटा बस सेवा समेत सञ्चालन गरेको छ । ‘पहिला नै एउटा बस ल्याइएको थियो तर विद्यार्थीको माग पूरा गर्न सकिएन, फेरि भर्खरै अर्को बस थपेका छौं’, उनले भने । १९ सय विद्यार्थी संख्या रहेको विद्यालयमा ४ सय जनाले बसको यातायात सेवा लिँदै आएका छन् ।
कक्षा १ देखि ५ सम्मको विद्यार्थीहरुका लागि स्वस्थ्यकर खाजा पनि खुवाउने समेत निर्णय गरेको व्यवस्थापन समितिका अध्यक्ष हरिबहादुर कार्कीले बताए । पुरानो विद्यालय पब्लिक सुनसरीको नमूना विद्यालयको रुपमा घोषित भइसकेको छ ।सरकारले हरेक स्थानीय निकायमा एउटा नमूना विद्यालय विकास गर्ने योजना बनाएको थियो । स्थानीय निकायका १०० वटा कोटामध्ये पब्लिक पनि नमूना विद्यालयमा परेको हो । विद्यालयहरूको सक्षमतामा सुधार गरी शिक्षामा रुपान्तरणको गतिलाई तीब्रता दिने उद्देश्यले सरकारले यस्तो योजना ल्याएको हो । यो विद्यालय सरकारीमा राम्रो पढाइ हुँदैन भन्नेहरूका लागि झापड बन्दै नमूना समेत बन्दै गएको छ ।

जहाँ १९ सय विद्यार्थी अध्ययनरत् छन्
पब्लिकमै करिब १९ सय विद्यार्थी अध्ययनरत् छन् । धरानमै सरकारी विद्यालयबाट विज्ञान सङ्काय पाएको विद्यालयमा म्यानेजमेण्ट, व्यवस्थापन, शिक्षा, इलेक्ट्रिकल इञ्जिनियरलगायतको पढाइ हुने गरेको छ ।
सरकारी स्कुलमा पढाइ राम्रो हुँदैन र छोराछोरीले गुणस्तरीय शिक्षा प्राप्त गर्न सक्दैनन् भन्ने अभिभावकहरुको बुझाइ रहेको पाइन्छ तर पब्लिकले प्रविधिमा फड्को मार्दै गुणस्तरीय शिक्षा प्रदान गर्न तल्लिन रहेको छ ।
कक्षा–१ देखि १० सम्म गणित, नेपाली, विज्ञान विषयको पढाइ प्रोजेक्टरबाट अडियो, भिज्योल कक्षा हुने गर्दछ । विद्यार्थीहरुको सुविधाका लागि यथेष्ट मात्रामा कम्प्युटर ल्याब, साइन्स ल्याब, पुस्तकालय, छात्रवृत्ति, अतिरिक्त क्रियाकलाप आदिको व्यवस्था छ । सिसी टिभी जडान भएको विद्यालय निजी विद्यालयभन्दा कम छैन । पढाइप्रति विद्यार्थी र अभिभावकहरू खुशी र पूर्णरूपमा सन्तुष्ट छन् । २०६३ सालबाट प्लस टुको पढाइ शुरु भएको पब्लिकमा सरकारी कोटामा कक्षा-९ देखि नै इलेक्ट्रीकल इञ्जिनिरिङको अध्ययन अध्यापन हुन्छ ।

LEAVE A REPLY

Please enter your comment!
Please enter your name here