लुकमान अन्सारी
सुनसरीः कक्षा–१० को माध्यमिक परीक्षा (एसइई) सर्ने हल्ला चलिरहँदा सुनसरीमा भने प्रत्येक परीक्षा केन्द्रमा हेल्पडेस्क राखेर भएपनि परीक्षा सञ्चालनको तयारी थालिएको छ ।
चैत ६ गते सञ्चालन हुने एसइई परीक्षा परीक्षा नियन्त्रण कार्यालय सानोठिमी भक्तपुरले गराउन लागिपरेको छ । सुनसरी जिल्लाभरिमा १३ हजार ६९ जना परीक्षार्थीहरू परीक्षा दिने र ४८ वटा परीक्षा केन्द्रहरु निर्धारण गरिएको छ । सुनसरी जिल्लाभरि रहेका जम्मा १२ वटा स्थानीय निकायमध्ये ११ वटा स्थानीय निकायलाई केन्द्र निर्धारण गरिए छ भने एक भोक्राहा नर्सिह गाउँपालिकामा मात्र केन्द्र नराखिएको सुनसरी शिक्षा विकास तथा समन्वय इकार्ई प्रमुख रमेशबहादुर दाहालले बताए । भौक्राहा नर्सिह गाउँपालिकाभित्रका विद्यालयहरूमा विद्यार्थीहरुको संख्या न्यून रहेकोमा सो स्थानमा केन्द्र नराखिएको इकाई प्रमुख दाहालले बताए ।
सो स्थानमा रहेका परीक्षार्थीहरूलाई नजिकको केन्द्र कोशी गाउँपालिकाको मधुवन र इनरुवा नगरभित्र रहेका नजिक पर्ने केन्द्रमा परीक्षा दिन केन्द्र मिलाएको छ । ४८ वटा केन्द्रमध्ये सामुदायिक नियमित ४४ वटा, संस्थागत नियमित ३ वटा, संस्थागत अपग्रेड एक वटा गरी जम्मा ४८ परीक्षा केन्द्र राखिएको छ ।
सुनसरीभरिमा जम्मा समुदायिक विद्यालय १०३ मा परीक्षार्थी नियमिततर्फ ६३३६ अपगे्रडतर्फ ३१६, विद्यालय संस्थागत १८३ मा परीक्षार्थी नियमिततर्फ ६१५९ अपग्रेडतर्फ २६, प्राविधिक विद्यालय ८ मा परीक्षर्थी नियमिततर्फ २३१ अपग्रेडतर्फ १ जना गरी जम्मा परीक्षार्थी १३०६९ र विद्यालय जम्मा २८६ वटा रहेका छन् ।
सुनसरी परिक्षा केन्द्रहरुमा केन्द्राध्यक्ष४८, सहायक केन्द्राध्यक्ष ८६, निरीक्षक ६५९, परीक्षा सहायक १३४, कार्यालय सहयोगी २५७ कर्मचारीहरू खटाउने गरिएको इकाई प्रमुख दाहालले बताए । हाल विश्वलाई त्रसित बनाइरहेको कोरोना भाइरसका कारण हरेक ४८ वटा परीक्षा केन्द्रहरुमा स्वास्थ हेल्पडेस्क राखिने समेतको व्यवस्था गरिएको उनले जानकारी दिए । सुनसरीमा परीक्षा सम्बन्धीसम्पूर्ण प्रश्नपत्र लगायत परीक्षा सम्बन्धी हरेक तयारी पूरा भएको उनको भनाइ छ ।

LEAVE A REPLY

Please enter your comment!
Please enter your name here